به دنبال عملیات هوایی نیروهای ارتش در ولایت بدخشان، ۳۲ هراس‌افگن طالب کشته شدند. در خبرنامه‌ای که از سوی وزارت دفاع افغانستان به نشر رسیده، آمده است که نیروهای ارتش در ولسوالی‌های کران، منجان و یمگان این ولایت عملیات انجام داده‌اند.
در خبرنامه آمده است که در نتیجه‌ی این عملیات ۳۲ هراس‌افگن طالب کشته و ۱۵ تن دیگرشان زخمی شدند.
ولایت بدخشان در شمال-شرق افغانستان از ولایت‌هایی است که با چین، پاکستان و تاجیکستان هم‌مرز است. این ولایت همه‌روزه شاهد فعالیت گروه‌های تروریستی است.
گفته می‌شود که جنگجویان تاجیکستانی، اوزبیکستانی و چچنی از خط مرزی تاجیکستان وارد این ولایت می‌شوند و دست به اقدامات هراس‌افگنانه می‌زنند. گذشته از طالبان، افراد مربوط به داعش نیز در این ولایت حضور دارند و سرگرم ایجاد ناامنی در شماری از ولسوالی‌های بدخشان استند.
