منابع محلی در ولایت زابل، می‌گویند که مقام‌های محلی و امنیتی این ولایت، شهر قلات، مرکز ولایت زابل را به طالبان تسلیم کرده اند.
عطاجان حق‌بیان، رییس شورای ولایتی زابل به روزنامه‌ی صبح کابل، می‌گوید که حمیدالله توخی، والی این ولایت شهر قلات را روز جمعه -۲۲ اسد-، معامله و تسلیم طالبان کرده است.
آقای حق‌بیان می‌گوید: «طالبان موترها تلاشی می‌کنند و هر موتر را یک-یک تفنگ می‌دهد و به سوی کابل روان می‌کند.»
در همین حال، یک منبع محلی در ولایت زابل که نمی‌خواهد نامش در خبرش ذکر شود، به روزنامه‌ی صبح کابل، می‌گوید که والی، فرماند‌ه‌ی پلیس و چند مقام دیگر این ولایت، با پادرمیانی بزرگان، شهر قلات را به طالبان تسلیم کردند و خود شان به سوی کابل حرکت کرده اند.
ولایت زابل در جنوب غرب افغانستان یکی از ولایت‌های نسبتا ناامن است و ولایت‌های غزنی و ارزگان در همسایگی این ولایت نیز به دست طالبان افتاده است.
