نیروهای ارتش با راه‌اندازی عملیات گسترده‌ای در ولایت بدخشان، توانسته‌اند که پس از ۵ سال، ولسوالی وردوج این ولایت را از کنترل هراس‌افگنان طالب خارج کنند.
وزارت دفاع، روز شنبه (۱۶ سنبله)، با نشر اعلامیه‌ای گفته است که در نتیجه‌ی این عملیات، حدود ۱۰۰ هراس‌افگن طالب خارجی و داخلی، کشته شده‌اند و ده‌ها نفر از اعضای دیگر این گروه زخم برداشته‌اند.
این وزارت، افزوده است که در میان افراد کشته شده، قاری فصیح‌الدین، والی نام‌نهاد طالبان برای بدخشان، قاری حافظ، مسؤول نظامی طالبان برای بدخشان و ده‌ها نفر از فرماندهان کلیدی این گروه شامل استند.
در اعلامیه آمده است که در جریان این عملیات، به نیروهای ارتش و غیرنظامیان آسیبی نرسیده است.
بدخشان در شمال-شرق افغانستان موقعیت دارد که با چین، پاکستان و تاجیکستان هم‌مرز است. این ولایت همه‌روزه شاهد فعالیت گروه‌های تروریستی است.
گفته می‌شود که جنگجویان تاجیکستانی، ازبیکستانی و چچنی از خط مرزی تاجیکستان وارد این ولایت می‌شوند و دست به اقدامات هراس‌افگنانه می‌زنند.
