مسؤولان امنیتی در ولایت بدخشان، می‌گویند که چهار سرباز ارتش در نتیجه‌ی انفجار ماین کنار جاده‌ای در این ولایت، جان باختند.
ثناءالله روحانی، سخن‌گوی فرماندهی پولیس بدخشان، به روزنامه‌ی صبح کابل، می‌گوید که یک عراده موتر رنجر نیروهای ارتش حوالی ساعت ۱۰:۰۰ پیش از چاشت روز جمعه(۲۴ اسد)، با ماین کنار جاده‌ای برخورد کرده است.
آقای روحانی، افزود که این رویداد در منطقه‌ی کوتل ریزگان ولسوالی ارگوی ولایت بدخشان، رخ داده است.
بر اساس معلومات سخن‌گوی پولیس بدخشان، در این رویداد افزون بر جان باختن چهار سرباز امنیتی، ۲ سرباز دیگر نیز زخمی شده‌اند.
تا اکنون فرد یا گروهی مسؤولیت این رویداد را به دوش نگرفته است.
ولایت بدخشان، در شمال-شرق افغانستان موقعیت دارد و با چین و تاجیکستان هم‌مرز است. این ولایت، همه‌روزه شاهد فعالیت گروه‌های تروریستی است.
گفته می‌شود که جنگجویان تاجیکستانی، ازبیکستانی و چچنی از خط مرزی تاجیکستان وارد این ولایت می‌شوند و دست به اقدامات هراس‌افگنانه می‌زنند.
