رییس اجرایی حکومت وحدت ملی، در گفت‌وگو با سرمربی تیم ملی فوتسال، تاکید کرده است که شهروندان افغانستان برای پیروزی تیم ملی فوتسال، لحظه‌شماری می‌کنند.
دفتر مطبوعاتی ریاست اجرایی، با نشر اعلامیه‌ای گفته است که عبدالله عبدالله، در یک تماس تلفنی، با عبدالرزاق ممرک، سر مربی تیم ملی فوتسال گفت‌وگو کرده است.
آقای عبدالله، صعود تیم ملی فوتسال را به مرحله‌ی نهایی رقابت‌های فوتسال آسیا، یک دست‌آورد بزرگ خوانده و این موفقیت را به آنان و مردم افغانستان تبریک گفته است.
آقای عبدالله، برای ملی‌پوشان افغانستان آرزوی موفقیت کرده و افزوده است که مردم افغانستان، برای پیروزی آنان در مسابقه‌ی نهایی، لحظه شماری می‌کنند.
رییس اجرایی همچنان علاوه کرده که شخصا بازی ملی‌پوشان افغانستان با جاپان را تماشا می‌کند.
این در حالی است که قرار است، تا دقایقی بعد، ملی‌پوشان تیم فوتسال افغانستان به منظور کسب مقام قهرمانی در رقابت‌های فوتسال آسیا، با تیم پرقدرت جاپان بازی کنند.
