عبدالله عبدالله عازم اوزبیکستان شد

صبح کابل
عبدالله عبدالله عازم اوزبیکستان شد

عبدالله عبدالله، رییس اجرایی حکومت افغانستان، به منظور شرکت در نشست سران حکومت‌های سازمان همکاری شانگهای، عازم اوزبیکستان شده است.

دفتر مطبوعاتی ریاست اجرایی حکومت افغانستان، با نشر خبرنامه‌ای گفته است که آقای عبدالله، صبح امروز جمعه (۱۰عقرب) در رأس یک هیأت بلندپایه‌ی دولتی به تاشنکند، پایتخت اوزبیکستان رفته است.

در خبرنامه آمده است که عبدالله عبدالله در نشست سران حکومت‌های سازمان شانگهای، به نمایندگی از حکومت افغانستان شرکت و سخنرانی می‌کند.

بر بنیاد این خبرنامه، قرار است رییس اجرایی حکومت در حاشیه‌ی این نشست با نخست‌وزیران روسیه، اوزبیکستان، قزاقستان، قرغیزستان، تاجیکستان، معاون اول رییس‌جمهور ایران، وزیر دفاع هند، سکرترجنرال سازمان همکاری شانگهای و اعضای بلندپایه‌ی شماری از کشورهای دیگر نیز دیدار و گفت‌وگو کند.

گفتنی است که در نشست سران حکومت‌های سازمان همکاری‌های شانگهای، در باره‌ی تحولات سیاسی-امنیتی منطقه، همکاری‌های اقتصادی، سرمایه‌گذاری‌های مشترک، توسعه، مقابله با دهشت‌افگنی، افراط‌گرایی و چالش‌های مشترک منطقه‌ای بحث و تبادل نظر می‌‌‎شود.

0 0 رای ها
امتیازدهی به مقاله
0
افکار شما را دوست داریم، لطفا نظر دهید.x
()
x