امرالله صالح، معاون اول ریاست‌جمهوری، گفته است، افرادی که در ولایت پنجشیر، تهدید به کوچی‌ستیزی کرده اند، به پنجه‌ی قانون سپرده خواهند شد.
آقای صالح، روز سه‌شنبه (۲۸ ثور)، در برگه‌ی فیسبوکش نوشت: «صدها سال است که مردم پنجشیر، روابط نیک و مراوده با مفهوم اقتصادی با کوچی‌ها دارند. به قوماندان امنیه‌ی پنجشیر هدایت دادم که هر چه زودتر از اقدام قانونی خود در ارتباط به اوباشانی که تهدید به کوچی‌ستیزی کرده اند، برایم اطمینان بدهد.»
آقای صالح، به نقل از فرمانده‌ی پولیس ولایت پنجشیر، گفته است که هیچ کاروان کوچی متوقف نشده و ویدیوی نشرشده، به خاطر جلب‌توجه بوده و جعلی است.
اخیرا ویدیویی از یک فرد مسلح غیرمسؤول به نام حمید خراسانی در شبکه‌های اجتماعی دست‌به‌دست می‌شود که در آن، او مانع داخل‌شدن رمه‌های کوچی‌ها به ولایت پنجشیر می‌شود.
حمید خراسانی، در این ویدیو می‌گوید که اجازه نمی‌دهد ولایت پنجشیر که یکی از ولایت‌های امن کشور است، با آمدن کوچی‌ها ناامن شود.
