مسوولان امنیتی در ولایت بدخشان، می‌گویند که در نتیجه‌ی انفجار در یک مراسم عروسی، ۱۳ نفر زخمی شده اند.
ثناالله روحانی، سخن‌گوی فرماندهی پولیس بدخشان، به روزنامه‌ی صبح کابل گفت که این رویداد، حوالی ساعت ۱۰:۰۰ شب گذشته (پنج‌شنبه، ۲۴ میزان)، در مربوطات ناحیه‌ی پنجم شهر فیض‌آباد، رخ داده است.
آقای روحانی، افزود که یک فرد ناشناس، در جریان مراسم عروسی، بمب دستی پرتاب کرده که در نتیجه‌ی آن، ۱۳ نفر زخم برداشته‌اند.
به گفته‌ی سخن‌گوی فرماندهی پولیس بدخشان، این فرد از ساحه فرار کرده و تلاش‌های پولیس برای شناسایی و بازداشت او، آغاز شده است.
تا اکنون فرد و یا گروهی، مسوولیت این رویداد را بر عهده نگرفته است.
ولایت بدخشان، در شمال-شرق افغانستان موقعیت دارد و با چین و تاجیکستان هم‌مرز است. این ولایت، همه‌روزه شاهد فعالیت گروه‌های تروریستی است.
گفته می‌شود که جنگجویان تاجیکستانی، ازبیکستانی و چچنی، از خط مرزی تاجیکستان، وارد این ولایت می‌شوند و دست به اقدامات تروریستی می‌زنند.
