صدها تن از سربازان روسیه و اوزبیکستان، در نزدیکی مرز افغانستان، مانور نظامی مشترکی را اجرا کردند.
به نقل از خبرگزاری رویترز، روز دوشنبه -۱۱ اسد-، نیروهای نظامی روسیه و اوزبیکستان، مانور نظامی را در مرز با افغانستان و ترمز اوزبیکستان آغاز کردند و قرار است این مانور، تا پنج روز ادامه یابد.
در این مانور نظامی، ۱۵۰۰ سرباز روسیه و اوزبیکستان شرکت کرده است.
در همین حال، قرار است روسیه، اوزبیکستان و تاجیکستان نیز، مانور نظامی‌ای را از ۵ تا ۱۰ آگست در ۲۰کیلیومتری مرز افغانستان، اجرا کنند. در این مانور، روسیه از ۱۸۰۰ سرباز و ۴۲۰ دستگاه نظامی کار خواهد گرفت.
اوزبیکستان به شمار دقیق سربازانش در این مانور نظامی اشاره نکرده؛ اما مقام‌های نظامی این کشور، گفته اند که سربازان و دستگاه‌های نظامی روز دوشنبه -۱۱ اسد-، در مانور سه‌جانبه-روسیه، اوزبیکستان، تاجیکستان- به تاجیکستان رسیده اند.
وزارت دفاع تاجیکستان نیز، اعلام کرده است که در این مانور نظامی، بیش‌تر از ۳۰۰ موتر زرهی، ۲۵ چرخ‌بال جنگی و تعداد نامعلومی جنگنده‌های بمب‌افکن و جنگنده‌های مختلف دیگر، آزمایش و مانور داده خواهد شد.
این سه کشور، در حالی در نزدیکی مرزهای افغانستان مانور نظامی برگزار می‌کنند که حمله‌های طالبان در کشور افزایش یافته است.
روسیه، بارها از وخیم‌شدن وضعیت امنیتی در افغانستان به ویژه شمال این کشور، نگرانی اش را ابراز کرده است.
اوزبیکستان، همسایه‌ی افغانستان نیز پس از افزایش حمله‌های طالبان در ولایت‌های شمالی، نگران مرز مشترک خود با این کشور است.
تاجیکستان که هم‌مرز با افغانستان است، پس از افزایش حمله‌های طالبان، هزاران سرباز را در مرز خود مستقر کرد و تا اکنون، به صدها سرباز افغانستانی، اجازه‌ی عقب‌نشینی به این کشور را داده است.
