مقامهای امنیتی در ولایت بدخشان، تأیید میکنند که در نتیجهی حملهی انتحاری در مربوطات ولسوالی وردوج این ولایت، چهار نفر زخم برداشته اند.
ثناالله روحانی، سخنگوی پولیس بدخشان، به روزنامهی صبح کابل، میگوید که حوالی ساعت 11:30 پیش از چاشت امروز (چهارشنبه، 12 سنبله)، یک مهاجم انتحاری قصد داشت تا قوماندان حبیب، از فرماندهان پولیس محلی در ولسوالی وردوج را مورد هدف قرار دهد.
به گفتهی او، این مهاجم انتحاری، به هدف اصلیاش نرسیده؛ اما در نتیجهی انفجار مواد منفجرهی همراهش، دو غیرنظامی و دو نفر از افراد زیر امر قوماندان حبیب، زخم برداشته اند.
ولایت بدخشان، در شمال-شرق افغانستان موقعیت دارد و با چین و تاجیکستان هممرز است. این ولایت، همهروزه شاهد فعالیت گروههای تروریستی است.
گفته میشود که جنگجویان تاجیکستانی، ازبیکستانی و چچنی، از خط مرزی تاجیکستان وارد این ولایت میشوند و دست به اقدامات دهشتافگنانه میزنند.
