رییس اجرایی حکومت وحدت ملی تاکید کرده است که انتخابات ریاست جمهوری پیش‌رو، (این‌بار) باید شفاف، عادلانه و سراسری باشد.
عبدالله عبدالله، دوشنبه شب (۱۰سرطان)، در همایشی در شهر شبرغان ولایت جوزجان، تاکید کرده است: «این بار باید انتخابات، شفاف، عادلانه و سراسری باشد و هر رأی حساب شود. بر اساس رأی پاک مردم افغانستان زعامت کشور انتخاب شود. مردم افغانستان تحمل یک بار دیگر به بحران رفتن را ندارند.»
او گفته است که انتخابات، نه تنها بالای تعیین زعامت و تیمی که در آینده می‌آید، بلکه بالای ثبات و آینده‌ی بهتر افغانستان نیز تاثیرگذار است.
آقای عبدالله، در بخش دیگری از سخنان خود گفته است: «هر قدری که صدای مردم درباره‌ی صلح بلند می‌شود؛ آواز جنایت و صدای بم‌گذاری تروریستان نیز بلندتر شنیده می‌شود. مردم افغانستان باید دست به دست هم داده و صدای واحد را بلند کنند و با کسانی که در مقابل مردم و سرنوشت‌شان ایستاده‌اند، مقابله کنند.»
او ادامه همچنان گفته است که جامعه‌ی جهانی نیز باید واقعیت‌های جاری در افغانستان را درک کند.
عبدالرشید دوستم، معاون اول ریاست جمهوری نیز در این همایش تأکید کرده است که آشکارا از تیم انتخاباتی ثبات و هم‌گرایی حمایت می‌کند.
عبدالله عبدالله، پس از چاشت روز دوشنبه (۱۰سرطان)، به منظور دیدار با عبدالرشید دوستم، معاون اول ریاست جمهوری به شهر شبرغان ولایت جوزجان رفته بود.
