مسوولان امنیتی در ولایت بدخشان، می‌گویند که ۲۰ تروریست طالب در نتیجه‌ی حمله‌ی هوایی نیروهای ارتش در این ولایت، کشته شدند.
ثناالله روحانی، سخن‌گوی فرماندهی پولیس بدخشان، به روزنامه‌ی صبح کابل می‌گوید که روز پنج‌شنبه(۸ عقرب)، نیروهای ارتش، بر شماری از قرارگاه‌های طالبان در ولسوالی یفتل این ولایت، حمله‌ی هوایی انجام دادند.
آقای روحانی می‌گوید که در نتیجه‌ی حمله‌ی نیروهای ارتش، ۲۰ تروریست طالب کشته و ۷ تن دیگر شان، زخمی شده اند.
سخن‌گوی فرماندهی پولیس بدخشان گفت: «در حملات هوایی ارتش، سه قرارگاه طالبان از بین برده شده است.»
گفتنی است که در جریان این حمله، به غیرنظامیان آسیب نرسیده است.
ولایت بدخشان، در شمال-شرق افغانستان موقعیت دارد و با چین و تاجیکستان هم‌مرز است. این ولایت، همه‌روزه شاهد فعالیت گروه‌های تروریستی است.
گفته می‌شود که جنگجویان تاجیکستانی، ازبیکستانی و چچنی، از خط مرزی تاجیکستان، وارد این ولایت می‌شوند و دست به اقدامات تروریستی می‌زنند.
