وزارت دفاع، اعلام کرده است که در نتیجه‌ی ضدحمله‌ی نیروهای ارتش در مربوطات ولسوالی راغستان ولایت بدخشان، تلفات سنگینی به هراس‌افگنان طالب وارد شده است.
در اعلامیه‌ای که روز شنبه (۱ سنبله)، از سوی وزارت دفاع منتشر شده، آمده است که هراس‌افگنان طالب، از چند روز به این طرف، حملات تهاجمی‌ای را بر پاسگاه‌های نیروهای ارتش در ولسوالی راغستان ولایت بدخشان، آغاز کرده اند.
بر اساس اعلامیه، نیروهای ارتش نیز، حملات هراس‌افگنان طالب را عقب زده و اراضی زیادی را از وجود افراد این گروه، پاک کرده اند.
وزارت دفاع، گفته است که در جریان درگیری‌ها، ۲۴ هراس‌افگن طالب کشته شده و ۴ نفر دیگر زخم برداشته اند.
ولایت بدخشان، در شمال-شرق افغانستان موقعیت دارد و با چین و تاجیکستان هم‌مرز است. این ولایت، همه‌روزه شاهد فعالیت گروه‌های تروریستی است.
گفته می‌شود که جنگجویان تاجیکستانی، ازبیکستانی و چچنی، از خط مرزی تاجیکستان وارد این ولایت می‌شوند و دست به اقدامات دهشت‌افگنانه می‌زنند.
