یک منبع امنیتی در ولایت بدخشان، می‌گوید که یک افسر امنیت ملی، در نتیجه‌ی کمین طالبان در این ولایت، کشته شده است.
این منبع امنیتی که نخواست نامی از او برده شود، به روزنامه‌ی صبح کابل، گفت که این رویداد، حوالی ساعت ۵:۰۰ عصر روز گذشته (پنج‌شنبه، ۲۴ میزان)، در شاهراه بهارک- فیض‌آباد، رخ داده است.
منبع، می‌گوید: « این رویداد، زمانی رخ داد که والی و رییس امنیت ملی بدخشان، از پاسگاه‌های امنیتی شاهراه بهارک- فیض‌آباد، دیدار می‌کردند و هنگام بازگشت، با کمین طالبان، مواجه شدند.»
به گفته‌ی منبع، در این رویداد، دو نفر دیگر نیز زخمی شده‌اند.
گروه طالبان، تا اکنون در این مورد چیزی نگفته است.
ولایت بدخشان، در شمال-شرق افغانستان موقعیت دارد و با چین و تاجیکستان هم‌مرز است. این ولایت، همه‌روزه شاهد فعالیت گروه‌های تروریستی است. گفته می‌شود که جنگجویان تاجیکستانی، ازبیکستانی و چچنی، از خط مرزی تاجیکستان، وارد این ولایت می‌شوند و دست به اقدامات تروریستی می‌زنند.
