عبدالله عبدالله، رییس شورای عالی مصالحه‌ی ملی، تأکید کرده است که تهدید چهره‌های مشخص به خاطر بیان اندیشه‌های شان، یک جنایت است.
آقای عبدالله، روز سه‌شنبه (۴ سنبله)، با رحمت‌الله نبیل، رییس پیشین امنیت ملی، محمد عمرزاخیلوال وزیر پیشین مالیه، کریم امین، عضو حزب اسلامی و شماری از چهره‌های سیاسی، دیدار کرده است.
در این دیدار، رحمت‌الله نبیل، رییس پیشین امنیت ملی، گفته است، اخیراً به فهرستی دست یافته که نشان می‌دهد او و شماری از مقام‌های پیشین و چهره‌های سیاسی، از سوی حلقاتی تهدید به مرگ شده‌اند.
او، افزوده است که این تهدیدها به دلیل بیان دیدگاه‌های واضح شان در قبال مسایل جاری صورت گرفته و این گونه می‌خواهند صدای آن‌ها را خاموش سازند.
از سویی هم، عبدالله عبدالله، گفته است که آزادی بیان، در نظام سیاسی افغانستان یک اصل بوده و چنین تهدیدهایی، نگران‌کننده است.
به گفته‌ی او، هیچ فرد یا گروهی، حق ندارد شهروندان افغانستان را به هر دلیلی به ویژه به خاطر بیان دیدگاه شان، تهدید کند.
آقای عبدالله، افزوده است که تهدید چهره‌های مشخص به خاطر بیان اندیشه‌های شان یک جنایت است و در این زمینه، با مسؤولان نهادهای امنیتی صحبت خواهد کرد تا اقدامات لازم برای حفظ جان آن‌ها صورت گیرد.
