وزارت دفاع امریکا یا پنتاگون، اعلام کرده است که چرخبال‌های ارتش حکومت پیشین افغانستان که در حال حاضر در تاجیکستان و اوزبیکستان است، در اختیار طالبان قرار نخواهند گرفت.
جان کربی، سخن‌گوی وزات دفاع امریکا که روز سه‌شنبه -۲۸ جدی-، در یک نشست خبری صحبت می‌کرد، گفت که تا اکنون تصمیم مشخصی در مورد انتقال یا عدم انتقال چرخبال‌ها به افغانستان گرفته نشده است.
او اما گفت، می‌توان تصور کرد که چرخبال‌ها برای استفاده‌ی طالبان به افغانستان فرستاده نخواهند شد.
بر اساس گزارش‌ها، هم‌زمان با سقوط افغانستان به دست طالبان، شماری از چرخبال‌های ارتش پیشین به کشورهایی چون اوزبیکستان و تاجیکستان منتقل شده است. چندی پیش، محمد یعقوب مجاهد، سرپرست وزارت دفاع طالبان گفت، چرخبال‌هایی که به اوزبیکستان و تاجیکستان انتقال یافته اند، باید دوباره به افغانستان برگردانده شوند.
او در آن زمان هشدار داد که اگر این کشورها چرخبال‌های افغانستان را تحویل ندهند، با پیامدهای بدی روبه‌رو خواهند شد. «طیاره‌های ما که در تاجیکستان و یا اوزبیکستان است باید برگرداند. اجازه نمی‌دهیم که این طیاره‌ها در بیرون بماند و یا آن‌ها استفاده کنند.»
