امامعلی رحمان، رییسجمهور تاجیکستان، دستور داده که ۲۰ هزار تن از سربازان این کشور، در مرز با افغانستان مستقر شوند.
آقای رحمان، روز دوشنبه -۱۴ سرطان- پس از تماس با برخی از رهبران منطقه به شمول رییسجمهور غنی و ولادیمیر پوتین، رییسجمهور روسیه، این دستور را صادر کرده است.
دولت روسیه، گفته است که ولادیمیر پوتین، به امامعلی رحمان اطمینان داده که در صورت نیاز، مسکو حاضر است تا در راستای تأمین امنیت در مرزهای تاجیکستان، همکاری کند.
رییسجمهور غنی، و امامعلی رحمان، روز یکشنبه -۱۳ سرطان- در تماس تلفنی، در بارهی شماری از شهروندان افغانستان که به دلیل ادامهی جنگ، از طریق مناطق مرزی به تاجیکستان پناه برده اند، صحبت کردند.
امامعلی رحمان، رییسجمهور تاجیکستان، وضعیت پیشآمده در افغانستان را نگرانکننده خوانده است.
از سویی هم، رییسجمهور غنی، با اشاره به حس بشردوستانهی تاجیکستان در برابر شهروندان افغانستان، گفته است: «دولت افغانستان در قبال شهروندانش مسؤول است و به زودترین فرصت، اقدامات لازم و فوری را برای رسیدگی به آنها انجام خواهد داد.»
با این حال، خبرگزاری رویترز، گزارش داده است که مقامهای تاجیکستانی در تلاش ایجاد کمپ برای افرادی اند که احتمال دارد در صورت گسترش دامنهی جنگ در شمال افغانستان، به این کشور پناه ببرند.
این در حالی است که در چند ماه اخیر، جنگ در ولایتهای شمال افغانستان گسترش یافته و همهروزه چندین ولسوالی به دست طالبان سقوط میکند.
خبرگزاری خاور تاجیکستان، روز دوشنبه -۱۴ سرطان- گزارش داد که به دنبال حملهی طالبان بر ولسوالیهای خواهان، شکی، نسی، ماهمی، شغنان و اشکاشم ولایت بدخشان، ۱۰۳۷ سرباز امنیتی افغانستان، از مرز عبور کرده و به این کشور عقبنشینی کرده اند.
این خبرگزاری، روز شنبه -۱۲ سرطان- نیز به نقل از مرکز رسانههای نیروهای مرزی کمیتهی دولتی امنیت ملی تاجیکستان، گزارش داده بود که بیشتر از ۳۰۰ سرباز امنیتی افغانستان، پس از درگیری با جنگجویان طالب و مقاومت شدید در برابر این گروه، به خاطر حفظ نیروی بیشتر به خاک تاجیکستان عقبنشینی کرده اند.
ولایت بدخشان افغانستان، با تاجیکستان مرز مشترک دارد و به گفتهی منابع محلی، در چند روز گذشته، نزدیک به ۱۰ ولسوالی این ولایت به دست طالبان سقوط کرده است.
گفتنی است که پیش از این نیز، در نتیجهی درگیریها در ولایت کندز، ۱۳۴ نفر از نیروهای امنیتی افغانستان، از طریق شیرخانبندر، وارد خاک تاجیکستان شدند.
به دنبال ادامهی درگیریها در ولایت بلخ نیز، گفته میشد که ۱۷ سرباز امنیتی پس از درگیری با جنگجویان طالب، به خاک تاجیکستان پناه برده اند؛ اما محمدفرهاد عظیمی، والی بلخ، این موضوع را رد کرد.