مقامات محلی در ولایت بدخشان، می‌گویند که در نتیجه‌ی برف‌کوچ بر یک معدن طلا در ولسوالی راغستان این ولایت، پنج نفر جان باخته اند.
نیک محمد نظری، سخنگوی والی بدخشان، به روزنامه‌ی صبح کابل می‌گوید که این رویداد، حوالی ساعت ۰۹:۳۰ صبح روز گذشته (چهارشنبه، ۲۰ قوس) رخ داده و در نتیجه‌ی آن، ۵ نفر کشته شده و ۵ نفر دیگر نیز زخم برداشته اند.
او افزود: «این رویداد در مربوطات روستای خالی‌چود ولسوالی راغستان (منطقه‌ی تحت تصرف طالبان) رخ داده است. شماری از مردم محل مشغول حفاری و طلاشویی بودند و برف از کوه میاید و آن‌ها را زیر می‌گیرد. ممکن است آمار تلفات این رویداد افزایش یابد.»
از سویی هم، یک منبع دیگر در ولایت بدخشان، می‌گوید که در نتیجه‌ی این رویداد، ۵ نفر جان باخته و حدود ۳۰ نفر دیگر ناپدید شده اند.
بدخشان در شمال-شرق افغانستان موقعیت دارد و با چین، پاکستان و تاجیکستان هم‌مرز است. این ولایت، همه‌روزه شاهد فعالیت گروه‌های تروریستی است.
گفته می‌شود که جنگجویان تاجیکستانی، اوزبیکستانی و چچنی از خط مرزی تاجیکستان وارد این ولایت می‌شوند و دست به اقدامات هراس‌افگنانه می‌زنند.
