منابع محلی در ولایت بدخشان، می‌گویند که ۱۲ سرباز پولیس محلی در نتیجه حمله‌ی طالبان در این ولایت جان باخته اند.
یک منبع محلی، به روزنامه‌ی صبح کابل، می‌گوید که این حمله، دوشنبه شب (۲۶ عقرب)، در منطقه‌ی پل کیبلی ولسوالی جرم این ولایت رخ داده است.
به گفته‌ی منبع، در این رویداد، ۱۲ سرباز پولیس محلی جان باخته اند و ۱۴ نفر دیگر زخمی شده اند.
با این حال، ثناالله روحانی، سخن‌گوی پولیس بدخشان، به روزنامه‌ی صبح کابل می‌گوید که در نتیجه‌ی این حمله، ۱۰ سرباز پولیس محلی کشته و زخمی شده اند.
او می‌افزاید: «گروه طالبان به هدف سقوط ولسوالی جرم حملات شان را از چندین استقامت آغاز کرده بودند که با مقاومت شدید نیروهای امنیتی روبه‌رو شد و شکست خورد.»
به گفته‌ی آقای روحانی، به دلیل از کار افتادن شبکه‌های مخابراتی در این ساحه، جزییات دقیق از تلفات نیروهای امنیتی در دست نیست. او می‌گوید که در جریان درگیری، به طالبان نیز تلفاتی وارد شده، اما آمار دقیق آن مشخص نیست.
ولایت بدخشان، در شمال-شرق افغانستان موقعیت دارد و با چین و تاجیکستان هم‌مرز است. این ولایت، همه‌روزه شاهد فعالیت گروه‌های تروریستی است.
گفته می‌شود که جنگجویان تاجیکستانی، ازبیکستانی و چچنی، از خط مرزی تاجیکستان، وارد این ولایت می‌شوند و دست به اقدامات تروریستی می‌زنند.
