وسله والو طالبانو په بغلان کې اوه کسان په ډزو وژلي دي. دا پیښه تېره شپه( د جمعې شپه) په خنجان ولسوالۍ کې له تراویح لمانځه وروسته شوې ده.
د بغلان د امنیې قوماندانۍ ویاند احمد جاوید بشارت وایي طالبانو د بغلان په خنجان ولسوالۍ کې اوه کسان د تراویح لمانځه تر ادا کولو وروسته کورته د تګ پروخت په ډزو وژلي دي. بشارت وایي په دوی کې دوه ماشومان هم شامل دي.
د بغلان د امنیې قوماندانۍ ویاند وایي:« طالب ترهګر له دغه عمل وروسته د پولیسو له خوا وژل شوي چې د دوو مړي یې د خنجان ولسوالۍ د پولیسو لاس ته ورغلي دي.»
په بغلان کې محلي مسوولین وایي د طالبانو دا کار د خلکو له تند غبرګون سره مخ شوی او هغه یې د روژې په میاشت کې یو وحشیانه جنایت بللی دی.
د سیمې اوسیدونکي وایي په روژه کې د عبادت پروخت دا ډول کړنې د ټولو اسلامي او انساني ارزښتونو خلاف دي.
طالبانو تراوسه په دې اړه څه نه دي ویلي. بغلان د هېواد په شمال ختیځ کې د شمال په لویه لاره پروت ولایت دی چې په دې وروستیو اونیو کې پکې د وسله والو طالبانو فعالیتونه ډېر شوي دي.
دا کسان په امنیتي پوستو د بریدونو ترڅنګ د شمال په لویه لاره هم وخت ناوخته په پوځي او اکمالاتي کاروانونو بریدونه کوي.
