امام‌علی رحمان، رییس‌جمهور تاجیکستان، گفته است که کشورش از تلاش‌های صلح در افغانستان و تصمیم افغان‌ها در این زمینه حمایت می‌کند.
عبدالله عبدالله، رییس شورای عالی مصالحه‌ی ملی، روز دوشنبه (۱ جدی)، در ادامه‌ی سفرهایش به منطقه برای جلب حمایت‌ها از روند صلح افغانستان، در یک سفر دو روزه، در راس هیئت عالی‌رتبه‌ی دولتی، به دوشنبه، پایتخت تاجیکستان رفت. آقای عبدالله در جریان این سفر، با امام‌علی رحمان، رییس‌جمهور تاجیکستان دیدار و گفت‌وگو کرده است.
آقای رحمان، گفته است که صلح و ثبات در افغانستان، صلح و ثبات در تاجیکستان، منطقه و فراتر از منطقه است.
به گفته‌ی او، افغانستان، تاجیکستان و منطقه، از دهشت‌افگنی، افراط گرایی و بی‌ثباتی متضرر شده‌اند و صلح و ثبات در افغانستان زمینه‌ی گسترش و توسعه‌ی تجارت و ترانزیت میان دو کشور، منطقه و اتصال آسیای مرکزی به جنوب آسیا را فراهم خواهد کرد.
از سویی هم، عبدالله عبدالله، در این دیدار، در باره‌ی تلاش‌های صلح، گفت‌وگوهای دوحه، دور بعدی گفت‌وگوها، سفرهای اخیر برای کسب اجماع منطقه‌ای و نقش تاجیکستان در تامین صلح در افغانستان صحبت کرده است.
آقای عبدالله، از افزایش خشونت و جنگ به عنوان یکی از نگرانی‌های حکومت و مردم افغانستان در این مرحله نام برده و بر ختم جنگ و قطع خون‌ریزی در جریان گفت‌وگوها تاکید کرده است.
پیش از این، آقای عبدالله به منظور جلب حمایت کشورهای منطقه از روند صلح افغانستان، به کشورهای پاکستان، ایران، هند، ازبیکستان و ترکیه سفر کرده بود.
