امامعلی رحمان، رییسجمهور تاجیکستان، میگوید که کلید پایان جنگ در افغانستان، در دیپلماسی و توافق سیاسی و اندیشیدن راههای معاصر به منظور تأمین رشد اقتصادی و اجتماعی نهفته است.
آقای رحمان که روز سهشنبه (10 حمل)، در دومین روز نهمین نشست «قلب آسیا – پروسه استانبول» صحبت میکرد، گفت که مسئلهی افغانستان هیچ گونه راهحل نظامی ندارد.
او گفت: «فعالیتهای تروریستی، افراطگرایی دینی، جرایم سازمانیافته و قاچاق مواد مخدر در افغانستان، نگرانکننده است. تروریستان و افراط گرایان، وضعیت را در افغانستان به دلیل دستیابی به اهداف شان پیچیده ساختهاند.»
رییسجمهور تاجیکستان، گفت که کشورش از موضع دولت افغانستان در گفتوگوهای صلح حمایت میکند.
به گفتهی او، در گفتوگوهای صلح، باید نفع تمام مردم در نظر گرفته شود و آیندهی افغانستان به دست شهروندان این کشور رقم بخورد.
آقای رحمان، گفت که جامعه جهانی و کشورهای دخیل در روند صلح افغانستان، باید در شرایط کنونی کنار شهروندان این کشور باشند و کمکهای بیطرفانه ارایه کنند.
رییسجمهور تاجیکستان گفت که درد شهروندان افغانستان، درد خلق تاجیک است و تاجیکستان برای حل بحران افغانستان قدمهای موثری را خواهد برداشت. «تاجیکستان خواستار برقراری صلح در افغانستان است و همکاری با افغانستان در اولولیت سیاست خارجی تاجیکستان قرار دارد.»
او در بخش دیگری از سخنانش، به روند صلح تاجیکستان اشاره کرد و گفت: «اولین دور مذاکرات صلح بین تاجیکها در کابل و آخرین آن در تالقان برگزار شد و ما شرایط جنگ و صلح را پشت سر گذاشتهایم. عاقبت تمام جنگها، صلح است. ما در روند صلح، تجربه زیادی داریم و آمادهایم با مردم افغانستان در این زمینه همکاری کنیم.»
امامعلی رحمان، همچنان گفت که تاجیکستان ارادهی قوی دارد که همکاریهایش با افغانستان را افزایش دهد و در راستای رفع چالشها در افغانستان تلاش کند.
او، از انتقال برق بیشتر به افغانستان نیز سخن زد و گفت که کشورش آماده است تا با افغانستان، در راستای تطبیق برنامههای مشترک همکاری کند.
