مقامهای امنیتی در ولایت بدخشان، میگویند که چهار تفنگدار غیرمسؤول، در مربوطات ولسوالی ارگوی این ولایت، توسط تروریستان طالب، کشته شدند.
ثناالله روحانی، سخنگوی پولیس بدخشان، به روزنامهی صبح کابل میگوید که این رویداد، حوالی ساعت ۱۰:۰۰ شب گذشته (چهارشنبه، ۱۹ سنبله)، در مربوطات ولسوالی ارگو، رخ داده است.
به گفتهی او، این تفنگداران غیرمسؤول، هنگام عبور از منطقهی زیر کنترل طالبان، با کمین مواجه شده و کشته شدند.
ولایت بدخشان، در شمال-شرق افغانستان موقعیت دارد و با چین و تاجیکستان هممرز است. این ولایت، همهروزه شاهد فعالیت گروههای تروریستی است.
گفته میشود که جنگجویان تاجیکستانی، ازبیکستانی و چچنی، از خط مرزی تاجیکستان، وارد این ولایت میشوند و دست به اقدامات تروریستی میزنند.