مقام‌های امنیتی در ولایت بدخشان، تأیید می‌کنند که در نتیجه‌ی حمله‌ی تروریستان طالب، فرمانده‌ی پولیس ولسوالی کوهستان این ولایت، جان باخته است.
ثناالله روحانی، سخن‌گوی پولیس بدخشان، به روزنامه‌ی صبح کابل می‌گوید که حوالی ساعت ۰۹:۰۰ صبح روز گذشته (سه‌شنبه، ۸ میزان)، تروریستان طالب، بر ولسوالی کوهستان این ولایت، حمله کردند.
به گفته‌ی او، در نتیجه‌ی درگیری، عبدالظاهر، فرمانده‌ی پولیس ولسوالی کوهستان با دو نفر از سربازان پولیس محلی، جان باخته اند و سه نفر دیگر، زخم برداشتند.
آقای روحانی، می‌گوید: «این حمله تا ساعت دوازده شب گذشته ادامه داشت و سپس، تروریستان طالب، عقب‌نشینی کردند.»
او، می‌افزاید که در جریان درگیری، ۴ تروریست طالب کشته شده و ۵ نفر دیگر، زخم برداشتند.
ولایت بدخشان، در شمال-شرق افغانستان موقعیت دارد و با چین و تاجیکستان هم‌مرز است. این ولایت، همه‌روزه شاهد فعالیت گروه‌های تروریستی است.
گفته می‌شود که جنگجویان تاجیکستانی، ازبیکستانی و چچنی، از خط مرزی تاجیکستان، وارد این ولایت می‌شوند و دست به اقدامات تروریستی می‌زنند.
