مقام‌های امنیتی در ولایت بدخشان، می‌گویند که در نتیجه‌ی حمله‌ی تروریستان طالب در ولسوالی یفتل‌بالای این ولایت، یک فرمانده‌ی پولیس محلی، جان باخته است.
ثناالله روحانی، سخن‌گوی پولیس بدخشان، به روزنامه‌ی صبح کابل می‌گوید که حوالی ساعت ۰۲:۰۰ بامداد شنبه (۵ میزان)، تروریستان طالب، بر پاسگاه‌های نیروهای خیزش مردمی، در منطقه‌ی دوآبه‌ی ولسوالی یفتل‌بالا، حمله کردند.
به گفته‌ی او، در نتیجه‌ی درگیری یک ساعته میان دو طرف، فردی به نام غازی، از فرماندهان پولیس محلی، جان باخته و یکی از افرادش نیز، زخم برداشته است.
آقای روحانی، می‌گوید که در جریان درگیری، چهار ۴ تروریست طالب نیز کشته شده و ۵ نفر دیگر، زخم برداشته اند.
ولایت بدخشان، در شمال-شرق افغانستان موقعیت دارد و با چین و تاجیکستان هم‌مرز است. این ولایت، همه‌روزه شاهد فعالیت گروه‌های تروریستی است.
گفته می‌شود که جنگجویان تاجیکستانی، ازبیکستانی و چچنی، از خط مرزی تاجیکستان، وارد این ولایت می‌شوند و دست به اقدامات تروریستی می‌زنند.
