به دنبال انتقادها از پرداخت‌نشدن معاش کارمندان دولتی، اکنون وزارت مالیه‌ی طالبان، اعلام کرده است که تا دو روز دیگر معاش دو ماهه‌ی کارمندان دولتی را پرداخت می‌کند.
احمدولی حقمل، سخن‌گوی وزارت مالیه‌ی طالبان، گفته است که معاش کارمندان دولتی از بودجه‌ی دولتی پرداخت می‌شود.
حمقل، تأکید کرده است که این وزارت تلاش می‌کند تا دو ماه معاش همه‌ی کارمندان دولتی را تا تاریخ ۲۵ قوس پرداخت کند.
این در حالی است که پس از سقوط کابل به دست طالبان، بیش‌تر کارمندان دولتی تا هنوز معاش دریافت نکرده اند. کارمندان دولتی بارها با راه‌اندازی گردهم‌آیی‌های اعتراضی، خواستار پرداخت معاش شان شده اند.
هرچند این گروه چندی پیش اعلام کرده بود که معاش سه ماهه‌ی کارمندان دولتی را به صورت یک‌جایی پرداخت می‌کند؛ اما تا هنوز موفق به انجام آن نشده است.
بیش‌تری کارمندان دولتی به دلیل دریافت‌نکردن معاش و رسیدن زمستان در وضعیت بد اقتصادی به سر می‌برند.
