مقامهای تاجیکستانی، گفته اند که این کشور آمادگی دارد تا 100 هزار مهاجر افغانستانی را بپذیرد.
به نقل از رویترز، یک مقام ارشد تاجیکستان، روز جمعه -1اسد-، گفته است که این کشور در حال فراهمکردن شرایطی است تا از 100 هزار مهاجر افغانستانی، پذیرایی کند.
امامعلی ابراهیمزاده، معاون کمیتهی اضطراری تاجیکستان، روز جمعه در نشستی، گفته است که جمهوری شوروی سابق، در حال ساخت دو انبار بزرگ برای ذخیرهی وسایل مهاجران در ولایتهای خاتلون و گورنو -در منطقهی مرزی بدخشان- است.
پیشتر امامعلی رحمان، رییسجمهور تاجیکستان، دستور داده بود که 20 هزار سرباز این کشور در مرز با افغانستان مستقر شوند. آقای رحمان روز دوشنبه -14 سرطان-، پس از تماس با برخی از رهبران منطقه به شمول رییسجمهور غنی و ولادیمیر پوتین، رییسجمهور روسیه، این دستور را صادر کرد.
این در حالی است که در هفتههای اخیر و به دنبال افزایش حملات طالبان، شماری از رسانههای تاجیکستانی، گزارش دادند که بیشتر از 300 سرباز امنیتی افغانستان، پس از درگیری با طالبان و مقاومت شدید در برابر این گروه، به خاطر حفظ نیروی بیشتر، به خاک تاجیکستان عقبنشینی کردند؛ اما دولت تاجیکستان، گفته است که آنها قبلا به افغانستان بازگشته اند.
تاجیکستان در حالی برای پذیرش 100 هزار مهاجر افغانستانی اعلام آمادگی کرده که به تازگی، مجلس نمایندگان امریکا، طرح پیشنهادی افزایش 8000 ویزهی مهاجرتی دیگر را برای افغانستانیهایی که با نظامیان امریکایی در افغانستان همکاری کرده اند و پس از خروج آنها در معرض خطر اند، تصویب کرد.
به نقل از خبرگزاری آسوشتیدپرس، مجلس نمایندگان امریکا، روز پنجشنبه -31 سرطان-، با 407 رأی موافق و 16 رأی مخالف، این طرح را تصویب کرد. قرار است این طرح در مجلس سنای این کشور به بررسی گرفته شود.
