میررحمان رحمانی، رییس مجلس نمایندگان، روز دوشنبه (۱۱ حوت)، با امام‌علی رحمان، رییس‌جمهور تاجیکستان، در شهر دوشنبه، پایتخت تاجیکستان دیدار کرده است.
رییس مجلس نمایندگان، در این دیدار گفته است که طالبان بر ادامه‌ی جنگ تمرکز کرده‌اند و جز جنگ برنامه‌ی دیگری ندارند.
آقای رحمانی، در مراسمی که در سفارت افغانستان در شهر دوشنبه برگزار شده بود نیز، گفته است که طالبان از راه نظامی برای رسیدن به قدرت می‌کوشند و برای عملیات بهاری آماده می‌شوند. به گفته‌ی او، گفت‌وگوهای صلح با این گروه، هیچ خوش‌بینی‌ای ایجاد نکرده است.
آقای رحمانی، هدف سفرش به تاجیکستان را تقویت همکاری منطقه‌ای برای مبارزه با تروریزم خوانده است.
گفتنی است که میررحمان رحمانی، روز شنبه (۹ حوت)، در راس هیئت بلندرتبه‌ای به شهر دوشنبه، پایتخت تاجیکستان سفر کرده بود.
