مقام‌های امنیتی در ولایت بدخشان، می‌گویند که طالبان بر ولسوالی نسی این ولایت، حمله کرده اند و در حال حاضر، درگیری میان نیروهای امنیتی و افراد طالبان ادامه دارد.
ثناالله روحانی، سخن‌گوی پولیس بدخشان، به روزنامه‌ی صبح کابل می‌گوید که حمله‌ی طالبان، حوالی ساعت ۰۵:۳۰ صبح امروز (پنج‌شنبه، ۲۹ عقرب)، بر ولسوالی نسی این ولایت آغاز شده است.
او می‌افزاید: «درگیری‌ها ادامه دارد. تدابیر جدی به خاطر دفع حمله‌ی طالبان روی دست گرفته شده است. شرایط برای فرستادن نیروهای کمکی مساعد نیست و با بهتر شدن هوا، نیروی کمکی فرستاده خواهد شد.»
آقای روحانی، جزییات بیشتری در این باره ارایه نکرد.
ولایت بدخشان، در شمال-شرق افغانستان موقعیت دارد و با چین و تاجیکستان هم‌مرز است. این ولایت، همه‌روزه شاهد فعالیت گروه‌های تروریستی است.
گفته می‌شود که جنگجویان تاجیکستانی، ازبیکستانی و چچنی، از خط مرزی تاجیکستان، وارد این ولایت می‌شوند و دست به اقدامات تروریستی می‌زنند.
