وزارت دفاع، اعلام کرده است که حمله‌ی طالبان بر پاسگاه‌های نیروهای ارتش در ولایت بدخشان، عقب زده شده است.
این وزارت، با نشر اعلامیه‌ای گفته است که هراس‌افگنان طالب، صبح روز سه‌شنبه (۱ دلو) از چندین استقامت، بر پاسگاه‌های نیروهای ارتش در منطقه‌ی پل‌سنگانی ولسوالی وردوج ولایت بدخشان، حمله کردند.
در اعلامیه آمده است که این حمله‌ی طالبان، با مقاومت نیروهای ارتش عقب زده شده است.
وزارت دفاع، افزوده است که در این درگیری، ۳ هراس‌افگن طالب کشته شده است. این وزارت گفته است: «جسد ۲ نفر از اعضای طالبان با ۳ میل کلاشیکوف به دست نیروهای ارتش افتاده است.»
ولایت بدخشان، در شمال-شرق افغانستان موقعیت دارد و با چین، پاکستان و تاجیکستان هم‌مرز است. این ولایت، همه‌روزه شاهد فعالیت گروه‌های تروریستی است.
گفته می‌شود که جنگجویان تاجیکستانی، ازبیکستانی و چچنی از خط مرزی تاجیکستان وارد این ولایت می‌شوند و دست به اقدامات هراس‌افگنانه می‌زنند.
