بازار مشترک میان افغانستان و تاجیکستان که سه سال پیش مسدود شده بود، روز شنبه (۵ اسد) با حضورداشت مقام‌های افغان و تاجیک، در ولسوالی اشکاشم ولایت بدخشان افغانستان بازگشایی شد.
ثناؤالله روحانی، سخنگوی والی بدخشان، به روزنامه‌ی صبح کابل می‌گوید که در برنامه‌ی بازگشایی این بازار مشترک، والیان ولایت بدخشان کشور تاجیکستان و ولایت بدخشان افغانستان اشتراک داشتند.
به گفته‌ی او، در این برنامه مقام‌های افغان و تاجیک روی توسعه‌ی فعالیت‌های تجارتی میان دو کشور تأکید کردند.
آنان بازگشایی این بازار مشترک را به سود باشندگان ولایت‌های بدخشان هردو کشور همسایه دانستند و اضافه کردند که داد و ستد در این بازار سبب بلند رفتن اقتصاد خانواده‌ها خواهد شد.
در این بازار مشترک که در نقطه‌ی مرزی دو کشور در ولسوالی اشکاشم افغانستان ایجاد شده است، بیشتر صنایع دستی به فروش می‌رسد.
بازار مشترک افغانستان و تاجیکستان سه سال پیش به دلیل ناامنی در ولایت بدخشان افغانستان، مسدود شده بود.
