ملاعبدالغنی برادر، از چهره‌های طالبان در راس یک هیات دیروز چهارشنبه( ۱۶ اسد) از قطر به ازبیکستان رفت.
هیات مذاکره کننده‌ی طالبان در جریان این سفر، پیرامون گفت‌وگوهای صلح افغانستان با مقام‌های ازبیکستانی دیدار و گفت‌وگو خواهند کرد.
گزارش‌ها می‌رساند که سفر هیات طالبان به ازبیکستان به رهبری ملاعبدالغنی برادر، به هدف زمینه سازی آغاز مذاکرات بین‌الافغانی انجام شده و ممکن است که سومین دور نشست بین‌الافغانی در تاشکند برگزار شود.
پیش از این، هیات گروه طالبان تحت رهبری شیرعباس استانکزی به ازبیکستان سفر کرده بود و با شماری از مقام‌های وزارت خارجه‌ی این کشور در مورد روند صلح افغانستان گفت‌وگو کردند.
هرچند، تاکنون گروه طالبان حاضر به مذاکره با حکومت افغانستان نشده است، اما تاکنون دو دور از نشست‌های بین‌الافغانی به میزبانی قطر و روسیه برگزار شده است.
هیات گروه طالبان به رهبری ملاعبدالغنی برادر در حالی به ازبیکستان سفر می‌کند که هشت دور از مذاکرات صلح میان نمایندگان این گروه و زلمی خلیل‌زاد برگزار شده و به پیشرفت‌هایی دست یافته‌اند.
