د افغانستان د اوبو چارو د تنظیم ملي اداره وایي په نیمروز کې د کمال خان بند د پرانیستې په موخه ټول چمتو والی نیول شوی دی.
د دغې ادارې تخنیکي مرستیال احمد ویس بصیري وایي دا بند د افغانستان له پاره خورا اقتصادي ارزښت لري.
بصیري د شنبې په ورځ په کابل کې یوې خبرې غونډې ته وویل د کمال خان بند د ۱۷۴ زره هکتاره ځمکې د خړوبولو ظرفیت لري.
په ورته وخت کې د کابل د سیندیزې حوزې عمومي رییس فومن فروغ په کابل کې د ځمکې لاندې اوبو په کموالي اندیښنه وښوده.
فروغ وویل چې د اوبو چارو د تنظیم ملي ادارې دې ستونزې ته پام سره غواړي د پلازمینې ترځمکې لاندې اوبه مدیریت کړي.
د هغه د څرګندونو له مخې په پيل کې به هغه ۸۰ څاګان بندې شي چې د ښار د سمسورتیا په چارو کې ترې استفاده کیږي.
فروغ وویل چې د کابل د شاه توت بند د پروژې په بشپړيدو او کابل ته د پنجشیرسیند د اوبو په لیږدولو سره به په کابل کې له ځمکې لاندې اوبو څخه استفاده ترټولو ټیټې کچې ته ورسوي.
د اوبو چارو د تنظیم ملي اداره د هېواد د اوبو د سرچینو ټولیز ظرفیت له ۶۹ میلیارد متر مکعب لوړ ګڼي.
د دغې ادارې د اوبو سرچینو عمومي رییس فایزالرحمن وایي له دې اندازې یې ۵۳ میلیارد متره مکعب یې سطحی اوبه دي.
د اوبو چارو د تنظیم ملي اداره وایي په افغانستان کې د وچکالۍ ګواښ ته په پام سره دا اداره د سطحی او ځمکې لاندې اوبو د مدیریت په موخه بیلابیلې برنامې تر لاسه لاندې لري چې د کمال خان بند پرانیستل هم د دې برنامو یوه برخه ده.
د کمال خان بند چې د هېواد یوه لویه او ملي پروژه ده د اوبو چارو د تنظیم ملي ادارې لخوا یې چارې بشپړې دي.
د کمال خان بند په نیمروز کې د هلمند پرسیند جوړشوی چې د نیمروز حاصل خیزو ځمکو ته اوبه چمتو کړي.
کمال خان بند له ۷ میګاواټو تر ۹ میګاواټه برېښنا تولیدولای شي، میلونونونه متره مکعب اوبه ذخیره کوي او شا اوخوا ۱۸۰ زره هکتاره ځمکه خړوبوي.
دا بند د هغه نومیالي کمال خان سنجرابی په نامه نومول شوی چې خوا وشاه اوه سوه کاله مخکې یې په دې سیمه کې ژوند کاوه.
د نیمروز د محلي مسوولینو په وینا کمال خان سنجرابي د خپل ژوند پروخت د هلمند سیند د اوبو د کابو کولو په موخه د خپل هڅو په لړ کې هلته د اوبو له پاره څو بندونه جوړ کړل، ترڅو د نیمروز حاصل خیزو ځمکو ته د هلمند له سیند څخه اوبه چمتو کړي.
د افغانستان د اوبو د کنترول ملي اداره وایي:« کمال خان شاوخوا اوه سوه کاله مخکې په هغه سیمه کې اوسېده، ملي، وطن دوست، ولسي او مبارزشخص و، هغه د هلمند اوبو د کنترول په هڅه کې و ترڅو د هغه سیمې د خلکو ژوند بدل کړي او سیستان ورغوي.»
سردارداودخان هم د دغه بند د جوړولو تکل وکړ، خو دې موخې ته ونه رسېد. د افغانستان د اوبو د تنظیم ملي اداره وایي د ولسمشرمحمد اشرف غني په لارښوونه دا ملي پروژه ګټې اخیستنې ته چمتو شوې ده.
