مرزبانی تاجیکستان، اعلام کرده است که ۳۴۷ تن از شهروندان قرقیز افغانستان، به این کشور پناه برده اند و دو کودک نیز هنگام فرار، جان باخته است.
به نقل از بی‌بی‌سی، مرزبانی تاجیکستان، گفته است که این افراد، روزهای دوشنبه و سه‌شنبه -۲۲ و ۲۳ سرطان- از جنگ‌جویان طالب فرار کرده و به این کشور پناه برده اند.
بر اساس گزارش، این افراد، همه قرقیزتباران ساکن در واخان بدخشان اند که به تاجیکستان پناه برده اند.
در گزارش آمده است که مرزبان‌های تاجیکستان، به دلیل ارزش‌های بشردوستانه به این افراد پناه داده اند.
این در حالی است که امرالله صالح، معاون اول ریاست‌جمهوری، روز چهارشنبه -۲۳ سرطان- در برگه‌ی تویترش نوشت: «طالبان ده‌ها خانواده را از پامیر بدخشان اخراج کرده و به آن‌ها گفته اند که یا به اسلام طالبان روی آورند، یا آن‌جا را ترک کنند.»
به گفته‌ی او، این خانواده‌ها، اقلیت قرقیزی استند که قرن‌ها در پامیر بدخشان زندگی کردند و از سختی‌ها جان سالم به در بردند؛ اما آن‌جا را ترک نکردند.
آقای صالح، گفته است که این خانواده‌ها، در حال حاضر در تاجیکستان در انتظار سرنوشت شان استند.
این در حالی است که در چند هفته‌ی اخیر، بسیاری از ولسوالی‌های ولایت بدخشان، به دست جنگ‌جویان طالب سقوط کرده است. به دنبال سقوط ولسوالی‌ها، بیش‌تر از یک هزار سرباز امنیتی افغانستان، به خاک تاجیکستان عقب‌نشینی کردند.
