به دنبال گسترش دامنه‌ی جنگ در ولایت بدخشان، بیش‌تر از یک هزار سرباز امنیتی افغانستان به تاجیکستان عقب‌نشینی کرده اند.
خبرگزاری خاور تاجیکستان، روز دوشنبه -۱۴ سرطان- گزارش داده است که به دنبال حمله‌ی طالبان بر ولسوالی‌های خواهان، شکی، نسی، ماه‌می، شغنان و اشکاشم ولایت بدخشان، ۱۰۳۷ سرباز امنیتی افغانستان، از مرز عبور کرده و به این کشور عقب‌نشینی کرده اند.
خبرگزاری خاور، روز شنبه -۱۲ سرطان- نیز به نقل از مرکز رسانه‌های نیروهای مرزی کمیته‌ی دولتی امنیت ملی تاجیکستان، گزارش داده بود که بیش‌تر از ۳۰۰ سرباز امنیتی افغانستان، پس از درگیری با جنگ‌جویان طالب و مقاومت شدید در برابر این گروه، به خاطر حفظ نیروی بیش‌تر به خاک تاجیکستان عقب‌نشینی کرده اند.
ولایت بدخشان افغانستان، با تاجیکستان مرز مشترک دارد و به گفته‌ی منابع محلی، در دو روز گذشته، نزدیک به ۱۰ ولسوالی این ولایت به دست طالبان سقوط کرده است.
این در حالی است که پیش از این نیز، در نتیجه‌ی درگیری‌ها در ولایت کندز، ۱۳۴ نفر از نیروهای امنیتی افغانستان، از طریق شیرخان‌بندر، وارد خاک تاجیکستان شدند.
به دنبال ادامه‌ی درگیری‌ها در ولایت بلخ نیز، گفته می‌شد که ۱۷ سرباز امنیتی پس از درگیری با جنگ‌جویان طالب، به خاک تاجیکستان پناه برده اند؛ اما محمدفرهاد عظیمی، والی بلخ، این موضوع را رد کرد.
